Friday, October 29, 2010

اجراءات السفر للسعوديه - الوظائف الطبية وفرص عمل الاطباء بالدول العربيه


اجراءات السفر للسعوديه من ساعه اتصال المكتب


السلام عليكم انا لاحظت ان معظم زمايلنا بيبقو تايهين ف انهم ازاى يخلصو الاجراءات بتاعه السفر للسعوديه بعد اتصال المكتب للتعاقد فانا هاكتب ملخص لمشاركاتى قبل كده علها تكون دليل للاطباء ف تلخيص ورقهم بكل يسر وسهوله والمشاركات دى كانت فى موضوع اعلانات مكتب التوظيف السعودى وفيها برضه مشاركات كتير مفيده مثلا ماما نونا ودكتور عمر يوولوجى وغيره مش عاوز انسى عشان محدش يزعل بس كلهم ما شاء الله مشاركين مشاركات مفيده وجميله 


وعليه انا هاقولكو الخطوات من الالف الى الياء بس اوعو تنسو الموضوع بتاع اعلانات مكتب التوظيف السعودى لان الموضوع ده اللى انا هانقلهلك هو امتداد للموضوع الاصلى ولا يغنى عنه بس الموضوع ده للاجراءات فقط 


اجراءات ما قبل الفيروس والكشف الطبى من ساعه اتصال مكتب التوظيف السعودى ع سيادتك عشان تروح تتعاقد




اولا لازم تروح التوظيف السعودى بالحاجات اللى هما طلبوها طبعا وهيا الجواز واصول الشهادات وصورتين شخصيتين بتروح المكتب بيطلعو على الحاجات دى وبيشرحلك مرتبك كام والمكان اللى انت مرشح ليه ويمضيك ع 3 حاجات العقد المبدأى وورقتين للكشف الطبى انك تخلصهم وترجعيهم ف خلال 3 ايام ودا طبعا مبيحصلش ووبياخد الصورتين بيحط واحده ع ورقه الفيروس وواحده ع الكشف الطبى بعد كده بتقعد شويه علبال ميجمعو 2 او 3 دكاتره كده وبعدين موظف تانى بينده ع الاطباء اللى مضو العقد المبدأى وبيدى كل واحد ورقه تفضل معااك عطوول وفيها الورق المطلوب اللى هما عاوزينك تخلصه وبيبدأ الموظف يشرحلك تعمل ايه 


انا هاتبرع اقولهولكم وعشان تروحو عارفين ايه اللى هيتقال 
هيقولكو اولا تروحو على مكتب اسمه الفهد نت ودا جنب دار الحكمه وراها بالظبط اللى هيا قريبه من القصر العينى الفرنساوى وتجهزو صوره شخصيه وصوره من العقد المبدأى والجواز و160 جنيه يعنى وانت طالعين من المكتب ومتوجهين الى فهد نت تبصو على اى مكتبه تصوير وتصورو العقد المبدأى ولو معرفتوش توصلو لاى مكتبه قريبه متضيعوش وقت وتدورو لان كل دقيقه تحاول تستفادو منها عشان تعملو حاجات كتيره ف يوم واحد لانه كمان فهد نت عنده تصوير هتروحو ازاى؟؟
اولا اللى عاوز ينجز بياخد تاكسى ويقولو ودينى لمركز اسمه فهد نت قريب من القنصليه وورا نقابه الاطباء هياخدله ف حدود 10 جنيهات ويودييييييييكم او الطريقه التانيه تروحو المترو الدقى طبعا وتركبو وتغيرو ف رمسيس اتجاه حلوان وتنزلو السيده زينب وتمشو لما تنزل من المحطه باتجاه القصر العينى الفرنساوى يعنى بتسألو الناس تروحو الفرنساوى ازاى وبعد كده الى نقابه الاطباء وورا نقابه الاطباء تسألو ع فهد نت وهو مش بعيد 


زى مقولنا تصورو العقد وتجهزو صورتين و160 جنيه وتديهم الموظف اللى ف المكتب وتقولو عاوز ورقه نت هيسألك مرشح فين هتقوللو ع المنطقه اللى انت رايحها وهتتلطع بتاع ساعه ونص ساعتين كده علبال ميخلص المهم لما تجيبو ورقه النت هيقولكو صوروهم من كل واحده 3 نسخ والصوره بنص جنيه يابلاش 


تصور ورقه النت وتتكل على الله الى مكتب اسمه جامكا ودا مش بعيد عن فهدنت يعنى بتسال الناس هيقولك امشى شويه قدام هتلقاه وانت ماشى بتسال عشان تمشى صح 


وانت ماشى تكون مجهز (نسخه من ورقه النت والجواز والبطاقه الشخصيه ) ولما توصل جامكا بتلقى واحد واقف عل الباب بيطلب منك الحاجات دى وبتدخل وبياخدو منك الحاجات وبتستنى شويه وبيندهو عليك ويدولك ورقه صغيره كده فيها المستشفى اللى هتكشف فيه طبى وهتلاقى سواقين بينادو على المستشفيات دى وانت خارج سيبك منهم واسال الناس اللى بره ازاى تروح المستشفى اللى انت رايحلو واعرف منه كويس دا طبعا لانك لو ركبت مع بتوع التاكس بتدفعلك 10 او15جنيه فى نظير انك ممكن تروحها ب3 جنيه ولا حاجه رايح جاى وبرضه اللى عاوز ينجز يمشى معاهم لو عايز بس كده احتمال متلحقوش تعمل الفيروس فى نفس اليوم
المهم عرفت ازاى تروح المستشفى كويس فضل قدامك (انك تروح المعامل المركزيه ودى جنب وزاره الصحه  )ممكن تاخد تاكسى ف حدود الخمسه جنيه او تتمشاها وفيه حوالى من ربع لتلت ساعه وبتسأل طبعا ازاى تروح هتلاقى الف من يدلك وانت ماشى برضه تجهز معاك (صورتين والجواز وورقه النت والنموذج اللى ادهولك المكتب بتاع الفيروس )وتروح هناك وهتدخل من باب خلفى والموظف هياخد منك الحاجات اللى قلتها وتدخل جوا تلاقى امه لا اله الا الله قاعده تعمل فيروس سى طبعا هتقول شكلنا كده مش هنعمله النهارده لا بالعكس هو طابور كبير وناس كتير هتروح للموظف اللى قاعد هتديلو الجواز وورقه المكتب وصورتين تانى بس بتخلص ف حدود ساعه ساعه ونص يعنى 
وانت خارج بتلاقى واحد قاعد ع مكتب للى عاوز يشوف نتيجته عن طريق النت والمفروض الخدمه دى لبتوع المكاتب السفريات مش لينا احنا بتوع مكتب التوظيف السعودى يعنى عشان ممكن يشوف نتيجته عن طريق النت وينزلها ويطبعها ويوديها المكتب بتاعه بدل ما يرجع تانى يستلمها من المعامل مع انها بتروح نسخه منها للمكتب بتاعهم اما احنا بتوع التوظيف السعودى المفروض ان احنا لازم نرجع نستلمه باليد عشان نوديها بنفسنا ولكن ميمنعش انك تشوفها عن طريق النت وبتدفع 5 جنيهات دا غير طبعا 120 اللى كعيتهم فوق 


بعد كده بسرعه تشوف تعرف تروح ازاى للمستشفى بتاعك اللى كان جاميكا مرشحهولك زى مستشفى النيل بدراوى او السلام الدولى او الصفا اوالشروق اوالقاهره التخصصى ولازم تبقى عارف ان اخر الكشف الساعه 4 عصرا يبقى لو لقيت نفسك هتتاخر لا مفر من التاكسى وهياخد ف حدود ال15 جنيه دا طبعا لو انت رايح النيل بدراوى وكمان للطبيبات اخرهم 3ونص وممكن يتساهلو 
بيطلب منك الموظف ف المستشفى220 والجواز وصورتين برضه ويلفففك شويه من التحاليل للرمد للجراحه للاشعه للباطنه ويقولك تعالى استلم النتيجه من 10 الصبح ل 5 عصرا جميع الايام وتانى يوم من 3 الى 5 عصرا برضه دا النيل بدراوى




كفايه كده انا ايدى تعبتنى وبيتهيألى كده فهمتو وكمان اللى هياخد عياله معاه اكتر من 18 سنه لازم يكون ليهم جوازات وورقه نت وكشف وفيروس والمرافق شرحه لو الزوجه مثلا الله بيعين 


الله معاكم


اجراءات ما بعد التحليل والكشف الطبى




بسم الله بدانا


اول حاجه تعمل فيش وتشبيه موجه للسفاره السعوديه وفيه منه عادى ومستعجل يفضل انك تعمل المستعجل


هتروح مصر تاخد نتيجه الفيروس ونتيجه الكشف الطبى وتروح رايح مكتب التوظيف السعودى هتدى الموظف النتيجه والكشف هيفتح الورق عشان يطمن ع النتيجه وان شاء الله النتيجه بتبقى كويسه ان شاء الله ويقولك روح صورلى الورق ده نسختين هتروح طالع من المكتب وبطبيعه الحال هتسأل على اى مكتب تصوير هيقولولك اطلع من المكتب وامشى فى وشك عدل متروحش السكه دى لان انا مشيتها وكل ما اقول الخلاص المكتبه اهه يقولولى لسه قدام وكل ما امشى اسال يقولولى لسه قدام لحد ما اتكسرت رجليا ووصلت اخيرا بصراحه بعيده خالص المهم ايه بقى الصح تطلع علطوول من مكتب التو ظيف وتروح رايح على شارع الدقى الرئيسى وتمشى عكس اتجاه البنزينه اللى اخر الشارع مش ناحيتها وقدام شويه هتلاقى مكتبه هتصور مرتين وترجع تديهمولو هيقولك يادكتور كمل باقى ورقك وتعالى ف خلال 10 ايام ولا حاجه كده




نبدا بقى ف الاجراءات السليمه وانت ف القاهره اليوم بتاع المكتب هتبقى مش مزحوم اليوم فاضى شويه لانك لوكنت ف القاهره تمانيه ونص او تسعه صباحا للى من المحافظات هتكون ان شاء الله خلصت من المكتب بعد طبعا متودى اللى قلنا عليه وهيقولك خلص ورقك وتعالى ف خلال 10 ايام هتروح طالع ع (الملحق الثقافى او القنصليه السعوديه)عشان توثق العقد عشان تاخد بيه اجازه بدون مرتب للسفر للعمل بالخارج لان المديريه بتاعتك مبترضاش غير انه يكون موثق 
هتروح على على الخارجيه اللى ف بلدك بعد ماتروح طبعا اكيد تانى يوم عشان توثق العقد بعد ماتكون وثقته من الملحق السعودى وتروح ع المديريه عشان تقدم على الاجازه بدون مرتب طبعا بالعقد الموثق من الملحق السعودى والخارجيه


وانت ف المديريه اعمل بقى الحاجات دى


1-هتعمل شهاده خبره من مديريتك ولازم تاخد بالك انك تستفاد باكبر قدر ممكن من السنوات يعنى لو هتكمل 4 سنوات مثلا فى 1/3 الجاى يبقى استنى عشان تكون كملت المطلوب لوطلعتها فى نفس اليوم هتروح طالع بيها على المحافظه من عند السكرتير العام هيعتمدهالك 
2-و هتروح ع الجامعه عشان توثق شهاده البكالوريوس والامتياز من عند امين الجامعه اعتقد من غير رسوم 


3- هتاخد شهاده الخبره والبكالريوس والامتياز بعد ما تكون ظبطهم زى ما قولنا وتروح بيهم ع الخارجيه فى محافظتك وتسال عليه طبعا وتوثقهم كل ورقه تقريبا ب 11 جنيه 
4- هتروح رايح مصر وع الملحق الثقافى اللى قريب من مكتب التوظيف السعودى وتوثق البكالريوس والامتياز 
5- وانت ف مصر هتروح ع فهد نت اللى انت طلعت منه ورقه النت وتديلو شهاده الخبره و70 جنيه عشان يوثقهالك من السفاره وبتاخد كم يوم كده 


هتروح المكتب وتودى اللى قدرت تخلصه وبعد كم يوم هترجع تاخد شهاده الخبره من فهد نت والفيش هيكون طلع وتوديهم المكتب 


هيقلولك روح ع البيت ولما تطلع التاشيره هنتصل عليك وبعد كم يوم ( من 10 الى 20 يوم ) بيتصلو عليك يقولولك تعالى خد التاشيره


هتاخد التاشيره وتروح طالع بيها ومعاك الاجازه اللى تكون طلعت ان شاء الله من المديريه لانها بتاخد ف حدود من ( 3 اسابيع الى شهر ) ع حسب المديريه لان الورق بيروح المحافظه وبيتوافق عليها من عند المحافظ هتروح طالع على المكان اللى بيطلع منه تصريح العمل مش عارف المكان بس ممكن تسال عليه ف المديريه وهياخده منك حسبه فلوس وكم صوره ويقولولك اسال بكرى ع تصريح العمل لو انت كويس ومنتاش ملتحى وملكش اى نشاط مش ولا بد بالنسبالهم مش هتتاخر هتاخده تانى يوم بس لو ليك متقلقش بتتاخر شويه ويمكن تروح امن الدوله عشان يظبطو معاك الحاجات اللى هما عاوزينها وبعد كده يطلعهولك عاادى 


بعد كده مكتب التوظيف هيتصل عليك عشان تاخد امر الاركاب وبعد كده بتحجز بيه للسفر والف سلامه وترجع بلدك ف الاجازات سالم وغانم وربنا ييسر لك امتحان الهيئه عشان تعرف ترجع تانى ويجددولك العقد 


نقاط هامه


اللى هياخد مراته وولاده معاه اولا لازم يكون للزوجه جواز سفر وهتعمل ورقه نت وهتكشف وتعمل فيروس زيك زيها 
الولاد اللى اكتر من 18 برضه زى امهم
لو الولاد صغيرين بيتضافو على امهم ومبيعملوش كشوفات وفيروس الا لوكانو اكتر من 18 سنه ومفيش مشاكل


طب لو الزوجه متعاقده زى حالاتك وعندك اولاد مضافين ع جواز سفرها هيتفصلو ويتعمل لكل واحد منهم جواز سفر لوحده وورقه نت ولو هما اكتر من 18 سنه هيكشفو ويتفيرسو قصدى يعملو الفيروس ولو اصغر يبقى ورقه النت بس وجوازات طبعا


طب لو عتدك طفلين واحد كبير ف حدود السنتين تلاته او اكتر وطفل تانى مثلا من خمس شهوور وانت طالع ممكن الاتنين يتعملهم جواز سفر واحد باسم الاكبر والصغير يضاف على اخوه وبكده هتعمل ورقه نت واحده( للتوفير يعتى) 


وطبعا عشان تعمل فصل للابناء المضافين ع امهم او مش مضافين تروح ع الجوزاات وتروح مصور جواز الام م صفحه 2 الى صفحه 9 على حسب عدد الابناء يعنى لو عندك طفل واحد وهتفصلو من امه تصور مره واحده ولو اتنين بقى صورتين وهكذا ومعاك 4 صور شخصيه لكل طقل بخلفيه بيضاء و65 جنيه للجواز الواحد رسوم 


اللى لسه متاجل ف الجيش بيروح عامل صوره طبق الاصل من المديريه من شهاده الجيش ويطلع ع الجوازات ومعاه صور من صفحه2 الى صفح 9 من الجواز عشان هيختمولو انو يروح الى منطقه التجنيد وبتاخد اذن سفر بيطلع ف نفس اليوم من المنطقه التجنيديه بتاعتك


طب اللى مخلص جيش لازم برضه يروح الجوازات ومعاه صوره طبق الاصل من الاعفاء بتاعك ويصور الجواز من صفحه 2 الى صفحه 9 ويقولهم عاوز اسافر هيختمولك انك غير مطلوب للتجنيد 


الله معاكم


يا جماعه لو انا غلطت ف حاجه او ناسى حاجه حد يرد ونسالكم الدعاء




اضافه للتفصيل


جزاكم الله خير كويس فكرتونا موضوع شهاده التطعيمات هتروح على المكان اللى بتطعم فيه هيختمولك الكراريس بتاعتهم ولو فيه ف نفس الوحده مكتب صحه هتكملى الاجراءات عندهم لو مفيش هما هيقولولك تروحى فين يعنى المكتب اللى انت تبعو وتروح تعملى الورقه بتاعه الشهاده التطعيمات ب 25 جنيه ولازم يكون معاكى الجواز او على الاقل رقمه وبععد كده تاخديهم وتروحى بيهم المديريه تختمهم من عند مدير المديريه ((((او تروح على قسم الميزانيه هتتمضى من رئيس قسم الميزانيه وبعدين من مدير المديريه وبعدين على المحافظه السكرتير العام بيعتمدها وبعدين تطلع على الخارجيه توثقهم وبكده دول خلصو 
كمان دا بيحصل فى مديريات ومبيحصلش فى مديريات تانيه لكن لو جيت تحسبها فرقها مش كتير كل اللى هتحتاجه 11 جنيه لكل ورقه بس)))


الجواز والعقد مهمين لتخليص ورقه النت 


الله معاكم




الطبيب المقيم كالتالى 


4000 اساسى(شهريا) 


  200 ريال عن كل سنه خبره (شهريا)


  15% من (الاساسى +الخبره)(شهريا)


  20% من الاساسى(شهريا)للجى بى 30%دوره 6 شهور لطب الاسره 40% للدبلومه 50% للماستر 


  400 ريال بدل انتقال (شهريا)


  3 شهور بدل سكن (الاساسى + الخبره )(مره واحده فقط)


  نص شهر بدل تاثيث اول متوصل (مره واحده فقط )